طريقة واحدة لتجنب خيبة الأمل في الحب

نص الحلقة :

صارت معي مع " مها فطوم " بودكاست راديوا الآن

 

بنفوت علي علاقة الحب من مبدأ شو بدي أخد مش شو بدي أعطي

ما تفوتوا علي العلاقات وأنت جوعان لأنك ستأكل من قمامة العلاقات

يعني جربي حطي اصبعك قدام عينك رح يختفي المشهد من قدامك فهاي المسافة هي مسافة  انك تشوفي الأشياء مثل ما هي

" ديانه "

 

سمعتوا صوت "ديانة أيوب" صحافية لبنانية وكاتبة وناشطة إعلامية مخصصة بالعلوم الإجتماعية مقيمة في الإمارات بجتمع فيها من فترة لفترة مع مجموعة من الأصدقاء والزملاء وبندردش بكتير مواضيع بتعجبني أرائها ونظرتها للحياة طلبت منها بعد نقاش عن مفهوم الحب والعلاقات بمجتمعاتنا العربية وأنه تكون ضيفتي في بودكاست صارت معي ضمن سلسلة حب وعلاقات وفعلا لبت الدعوة وكان هذا الحديث ۔۔ " مها فطوم "

 

أدميس عنده مقولة مشهورة كتير بيقول أنا أشك أنه في حب بالعالم العربي العالم العربي في تجاذب وإعجاب وانجاب اطفال هاي المقولة الي حد كبير يمكن بتمثل جزء من رأي ما بدي أقول رأي بالمطلق لأن أكيد في حب حقيقي غير التجاذب والانجذاب وانجاب الاطفال في ناس بتعرف تحب بس إحنا بالمجتمع العربي بنفوت علي علاقة الحب من وجهة نظر خاطئة يعني بنفوت علي علاقة الحب من شو بدي أخد مش شو بدي أعطي فبالتالي نحن بنبدأ غلط يعني لما تبلشي بالشئ غلط فبالتالي هتكون النهاية ويمكن هذا اللي بيفسر النهايات يعني ليش عندك في علاقات حب ناجحة وعلاقات فاشلة اوكي فهي النية كيف عم فوت علي العلاقة انك تفوتي من منطلق شو بدي امنح الأخر انا عندي حب بدي اعطيه للأخر عندي اهتمام انا ممتلئة أصلا بالحب فأنتي بتفوتي مش منطلق حاجة بتفوتي من منطلق عطاء والعطاء هو أسمي معاني الحب أصلا فهون بيتجلي الحب بينما لما افوت أنا بدي أخد من الأخر عم فوت وأنا بحاجه نيد يو نو انتي لما تكوني فايته وانتي محتاجة الشئ في مثل في مقوله انه تقولوا ما تفوتوا علي العلاقات وأنت جوعان لأن ستأكل من قمامة العلاقات يعني ما تفوت علي علاقة وانت جائع ماراح تعرفي تاخدي الشئ الصح ۔۔۔ بصوت " ديانه "

 

كمان لفتني ديانه رأي لإلك أنه الحب ما بيكون بطريقة واحدة أو بلغة واحدة " مها"

 

بالأحري في كتاب بيحكي لغات الحب الخمس هاي الكتاب بيعرفني علي انه نحن لما نحب بنروي الحب من هادول اللغات يا اما اللمس اما الكلام الجميل والاطرات اما الافعال الوقت او الهدايا فنحن كمان لحتي نكون علي مسافة أو علي السكة الصح لعلاقة الحب لازم نشوف انه الشخص اللي بنحبه بلغة من هادول اللغات هو بيحكي لانه بيجوز يمكن اللغه اللي انا بحكيها هو بيحكي لغة تانيه مغيره بيجوز انا بيعنيلي الوقت وهو بيعنيله انه بالنسبه لاله انه يقدملي هدية هو عبر عن حبه وهذا الشئ بيدارج وهون لازم نخلق صيغة حوار يعني انه نحن لازم نتحوار انه نحاول نتواصل لنقارب لغات الحب لحتي نقدر نحكي صيغة مشتركة بينك وبني الاخر لان الحب مختلف بين الشعر والروايات يمكن الروايات اكتر شئ بتكتب عن الحب وبين شو المفهوم العلمي للحب علميا الحب هو شعور يعني هو المفروض علم النفس يشرح الحب وليس الشعر والروايات ولما نقول شعور فهو مثل مثل الغضب مثل الحزن مثل الكره مثل اي شعور تاني حتي نشرحه علميا كيف بيحدث في مراحل للحب والقلب ما له صله بالحب كيف ما بيروج لاله بالشعر او بالرويات يعني مش نحن بنحب بعقلنا مش بقلنا طبعا نحن كيف بيضل الحب هاي مراحل بدك بنحكي عنها بالتفصيل بنحكي ۔۔۔۔ بيدا الحب بالانجذاب طبعا الانجذاب علميا بيحتاج من 3 ل 4 دقايق لتنجذبي لشخص الانجذاب بيكون بانك بانتي بتنجذبي للشكل الخارجي لنبرة الصوت والمظهر طبعا هلا الحب بيصير انه العقل بيعطي اذن انه انا بدي حب هذا الشخص علميا اذا بدي فوت في علاقة صح ويكون الحب حقيقي وواقعي بدك 6 شهور من المواقف الصحية واذا فينا نقول متوازنه نفسيا والمعامله الحسنه والسوية لحتي انتي تحبي الشخص وهذا هو الحب الحقيقي اما انك تعطي الاذن انك تحبي شخص فورا قبل تراكم هاي المواقف فا انتي هو تكوني عم تحبي انتي امرتي عقلك انه انا بدي حب هذا الشخص بس هذا بيكون انجذاب اكتر مانو حب  يمكن في انجذاب شغف تعلق في كتير حالات هي مشاعر متخالطة يمكن الناس ما بتعرف تميزها عن الحب لانها بتشبه الحب لكن هي ليست الحب الحقيقي لان الحب بيجي بعد تراكم مواقف يعني اذا بدك حياة سويه لمدة 6 شهور ۔۔۔ بصوت " ديانه "

 

6 شهور! " مها "

 

ايه 6 شهور " ديانه "

 

اوكي هاي مراحلة اذا بنفسره كشعور من ناحية علميه طيب وانتي شكلك مياله لهذا التفسير اكتر من تفسيرة بالشعر والروايات ۔۔۔ " مها"

 

ايه لانه حاسه انه الحب الللي بالشعر حلو كتير ولكن بالحقيقة هو موجع لانه لما تحبي او لما تعطي الاذن لحالك انك تحبي شخص قبل ما تختبريه فانتي عم تعطي هذا الشخص الاذن انه هو يكون اله سلطه شوي عليكي لان الحب لما اذا بدنا نرجع كمان للتفسير العلمي انه الحب هو عباره عن افراز هرمونات هو اول هرمون بينفرز لما ننجذب لشخص هو هرمون الدوبامين وهنا الشعور بالفرح انه انا شوفت هذا الشخص او حكيت معه هذا بعدين بتصير تتصاعد الهرمونات لحتي نوصل لهرمون الادمانوهون لما نكون هن وصلنا لهرمون الادمان بيصير عندنا ادمان للشخص يعني حاله تعلق والتعلق بعلم النفس هو حاله مرضيه وهون نكون اتورطنا بمشاعر قبل ما نتأكد هو الشخص الصح او لا يعني أنا مع انه اذا بدك تسأليني مع أني أنا اسمح لحالي اني حب لما اتاكد بتراكم المواقف انه هذا الشخص هو الشخص الصح اللي انا بيستاهل انه أعطيه لأنه أنا بمفهوم الحب يعني هو كمان عطاء بالاخر انتي بدك تعطي بيستاهل انك تعطيه هذا الحب لأنه بالأخر هتشوفي أنه في فتوره بتدفع بالحب فأنتي لازم يكون عندك سؤال كتير مهم هالشخص قادر علي سداد هدي الفتورة أو لا ۔۔۔ بصوت"ديانه "

 

طيب هلا ممكن حدا ببيكون عم يسمعنا بيقول هذا الحكي مش صح لأن مجرد ما حسبنا وقيسنا هيك أشياء صارت ما تصف الحب الحب هو شئ يا بيجي من أول لحظة يا ما بيجي في ناس بتأمن بالحب من أول نظرة يعني ۔۔۔ " مها "

 

هلا الحب من أول نظرة مش موجود يعني هو انجذاب الانجذاب يحدث من اول نظرة الاعجاب يحدث من اول نظرة حالة شغف ممكن توقع من أول نظرة بس الحب من أول نظرة لا  ۔۔۔ بصوت " ديانه "

 

بالعودة لرأي الشاعر والمفكر أدوميس بلي انطلقنا منه للحلقة سالتها لدينا عن السبب أنه بمجتمعتنا العربية الحب غير موجود  ۔۔۔ بصوت " مها "

 

شوفي نحن خلينا نقول اول شئ من التربية التربية بالعالم العربي خلينا نحكي عن التربية بشقين الشق الاول شق التربية للذكورية الها حد معين يلي نحنا بنتربي بمجتمعات الذكر فيها يعامل بمعاملة مختلفة عن معامله الانثي يعني الرجل بيحقله يكون عنده علاقات يمكن اكتر بيحقله ياخد حريته علي نحو اكبر حتي معود يمكن من مبدأ اذا بدنا نقول تفاصيل كتير بسيطة بالبيت انه مثلا امه بتحطله اكلات وهايدي كلها تربية ذكورية تنشئ الذكر بطريقة مختلفة عن الانثي هاي من ناحية ومن ناحية تانيه وهادا الشئ يمكن بيكون ساري علي الذكر والانثي انه نحن بمجتمعنا يمكن يمكن ما بنعبر كتير وما عم نحكي هون عن حب حبيب لحبيبته يعني حتي الاب والام الاخ والاخت بالعيله يعني ما كتير بتشوفي في تعبير عن مشاعر الحب فبالتالي هذا بيخلق كمان حاجة عندك أو خلل لأن انتي تشوفي انه بدك تحصلي علي الحب من بره فبتصيري انتي عم تدوري علي اي شئ تاخديه من بره وبتصيري هون انتي اكثر عرضة ان انتي تاخدي اي مشاعر حب بتلاقيها من اي مكان يعني هون في مثل بقولك اياه انا بعرف شخص اللي هو عنده بنت كبيرة بالجامعة وكتير بحب طريقته بالتعاطي مع بنته يعني لما يكون بيوصلها علي الجامعه بيكون عم يتغازل بلبسها بشعرتها يعني انتي طالعه كتير حلوة اليوم لأن عنده نظرية أنه تسمع مني وتشبع هالحكي مني علشان ما تميل عند اي شخص ممكن يسمعها هذا الحكي ويكون هو الشخص اللي مش صح وهذا الشئ كتير حقيقي نحن مش معودين انه نسمع كلام اطرائات او نعبر عن مشاعرنا فبالتالي نحن يعني بنتربي بطريقة بتخلق جواتنا عقد بتخلق جواتنا حاجات بتخلق جواتنا أحيانا نقص لتعبير عن حب فأكيد فيما بعد هينعكس علي خيارتنا بالمستقل كيف رح نختا الشخص اللي بنحبه او كيف رح تكون العلاقه لما نحب ۔۔۔ صوت " ديانه "

 

طيب يعني انتي هلا وصفتي حالة او أزمة مجتمع كامل يعني بالعودة لنبرر ليش عم يتحكي هيك او ليش رأيك هيك بتتفقي معه يعني اذا بدنا نعتمد علي هذا الكلام فنحن المفروض نقتنع منطقيا الكلام صحيح فعلا نحن مجتمعتنا العربية في ازمه بالتعبير بالتربية وفي ازمه بمفهوم العادات والتقاليد والعيب والحرام وشو حدودنا بالتعبير عن مشاعرنا فاذا يعني الطرفين مظلومين فينا نقول يعني الشاب والصبية صح

" مها "

 

صحيح صحيح ۔۔  "ديانه "

 

طيب شو برأيك ممكن يكون الحل ليكون في علاقة نوع ما سليمة ومتكافئة من ناحية المشاعر من ناحية العطاء والاخذ ۔۔۔ " مها "

 

يعني اول شئ لازم هون لما قلتي للطرفين مظلومين الطرفين مظلومين لقولك شغله مها في نقطة كتير مهمه انه بالعالم العربي البنت بتتربي علي التفاني بالحب واكيد انتي بتشوفي هيك حالات يعني ، المرأه هي بتتربي كزوجة لازم تعطي كل شئ لازم تقدم كل شئ هلأ هيدا الشئ مش منيح لأكتر من سبب وأحد اهم الاسباب انه انتي لما تعطي كتير بترفعي سقف توقعاتك لما بدك تاخدي من الاخر فلما يجي وقت وتتعبي وانتي تقولي انا بدي انا محتاجة وتشوفي انه العطاء بالمقابل ما كان متكافئ مع عطائك رح تحسي انه انتي رح تصابي بخيبه وبصدمه وتصيري تحسه انه كل شئ غلط انه كل العلاقه غلط انه انا عم بقدمله وهو ما عم يعطيني بس هو الغلط الاساسي كان من التفاني لانه حتي لو كان الحب عطاء مثل ما انا بؤمن فيه ومثل ما قولتيلي انه وجهة نظرك انه انتي تعطي هو امتلاء وعطاء وانه لازم يكون كمان اخد وعطا يعني الاتنين سوا بدي اعطي بمحسوبيه بميزان يكون في ميزان انه هيدا الانسان بيستاهل اعطيه بس كمان اكون عم حب حالي بذات الوقت ما عم بديه عن حالي في اولويات في الحياه بدها تترتب فهذا كتير مهم كمان فهن الاتنين مظلومين كمان والمرأه للأسف عم تظلم بهذا الشئ لأنه دايما هي تغرس بالمفهوم بالموروث يمكن بعادتنا انه هي لازم تضحي هي لازم تتفاني هلا شوي أفضل هلا كيف ممكن نقدر نغير هذا الكونسبت يمكن كيف نغير هالمفاهيم يمكن اليوم السوشيال ميديا بيوعي اكتر صار في كتير انا مع اللايف كوتشز كيف بيساعدوا يمكن مش هن الحل لحتي يوجهوكي بس اليوم في فيديوز كتير علي السوشيال ميديا بيعطوكي علي القليلة أفكار انه تعلمك انه انتي كيف تحبي حالك اكتر كيف تقدري حالك اكتر كيف تثمني اي شئ بتعطيه للأخر اكتر وهذا الشئ بيوجهك شوي شوي علي الطريق الصح  وفي نقطة كتير مهمة انه نحن لما نحب انه احنا احيانا انه الحب او لما نختار شخص لما قولتلك بالبداية انه هي النيه بالعلاقه انه انا اخد او اعطي انه انه بحب بدي خلي الشخص خليني سعيدة اكتر او انه انا بدي امشي مع هالشخص تا نتطور انا وياه ونرتقي بينتنا لمكان افضل وبالتالي هون قد ايه بيحضرك ناس انه بتقولي انه شريكي تغير هو اتطور فهي الفكرة انه انا كمان قد ايه عندي قابلية لأني اتطور معه وامشي معه ما اقول عنه فجاة بلحظة ما انه هو اتغير هو كان يعمل هيك بطل يعمل هيك لانه نحن بشر نحن شخصيتنا بتطور حياتنا بتطور وبتتغير فبالتالي من الطبيعي انه نحن يكون عندنا قابلية للتطور ۔۔۔ بصوت " ديانة "

 

هاي التطور مع بعض من اهم الأشياء اللي بتحافظ علي العلاقه ويكون في ادراك لإلها يعني ما دوغري نكون جاهزين للتهم انه اتغيرت واتغيرت تنجرب نفكر هالتغير شو جذورة شو اسبابه بلكي نقدر نواكبه يعني ۔۔۔ " مها "

 

نجرب نسأل ! يعني كتير مهم الحوار مع الطرف الاخر يعني انه نسأل يعني انا اليوم لو شوفت كتير غلط بالعلاقه او شوفت شئ ما عاجبني نخلق حوار نخلق صيغة تواصل الحوار البناء بالعلاقه هو اللي بيوديكي لمطرح كتير احلي ولأنه تنجح العلاقه لحتي يكون يعني في ثقه بينك وبين الاخر ما يكون في تبويات يعني اليوم بمجتمعتنا في احيانا في اشياء بنخجل نحكي عنها لانه ما اتعودنا نكون صرحين بنخجل نعبر عنها ليكي الحوار هو اللي بيخلق علاقة سليمة اكتر

بصوت " ديانه"

 

طيب انتي مع انه مهما تطورت العلاقه بين طرفين وحبو بعضن كتير واتفاهموا علي كل شئ مع انه يحافظ كل واحد منن علي مساحه وخصوصيه اله ؟ " مها "

 

ايه ، لأنه هي مسافة مسافة أمان اذا بدنا نسميها يعني بكل العلاقات بالحياه في مسافة أمان اليوم انتي اذا بتطلعي علي الشئ كتير قريب ما بقي بتشوفيه يعني جربي حطي علي اصبعك قدام عينك رح يختفي المشهد من قدامك فهايدي المسافه هي مسافة  لإنك تشوفي الاشياء متل ما هي وانك تعطي الاخر مساحته هيدا الشيئ بيخلق كمان بالعلاقه يمكن توازن أكتر لما يكون أنا عندي مساحتي مع أصحابي مساحتي بشغلي مساحتي يمكن مع عيلتي كمان لانه في خصوصيات فأكيد بينعكس علي العلاقه بعدين بين الشخصين بطريقة أفضل أكيد أنا مع المساحة  ۔۔۔ " ديانه"

 

مرة شوفت فيديو لأخصائية بالتربية عم بتقول فيه انه ليش بناتنا بس يكبروا ويتجوزوا بيقبلوا انن ينهانوا وينضربوا ويتعنفوا من رجالهن ، جزء من الاسباب طبعا مش كلها جزءانهم ربيوا البعض منهم طبعا ربيوا في بيئات مفهومهم عن الحب مشوه ۔۔ يعني بتقولها امها انه انا ضربتك لأنه بحبك تكبر البنت او الصبي انه اه اللي بيحبني بيضربني بيعاقبني فبيقبلوا هذا الشئ من شريك حياتهم شو رأيك انتي بهذه النقطه ؟؟ ۔۔۔ بصوت " مها "

 

صحيح لأنه انتي عندك أكبر مثال علي ذلك أنه عندنا مثال علي ذلك بيقول أنه " ضرب الحبيب مثل أكل الزبيب " ههههه فأنتي بتتقبلي هذا العنف لانه يمكن خف شويه حاليا يعني حاليا ما بقي في يمكن يعني التربية الحديثة صارت الامهات اوعي شوي يعني ما بقي بيعنفوا بس ايه في جزء منهم انه تربينا او تربت الانثي علي مبدأ انه الزوج عنده القدرة وعنده السلطة انه بيكون هو بيقدر يعمل اي شئ وهذا الشئ للاسف بعده موجود مها يمكن مع ناس مثقفين ومتعلمين يعني يعني ما تستغربي اذا ما قولتلك انه انا بعرف شخص أنه طلب واحدة للزواج وأول شئ سألها اياه وهو شخص متعلم جدا انه هل رح تكوني زوجة مطيعه ؟؟

يعني أنه فكرة أنه تكوني زوجة مطيعه ان تكون السلطة بالكامل عندي وانتي تؤمني فيني وقراراتي طيب هذا الشئ رح يصير هو بمجريات الحياة رح يحدث أنا لو مش مؤمنه فيك ما رح ارتبط فيك بس انت لما تطلب هالشئ دليل نقص فيك من البداية !! فما تستغربي انك تشوفي هيك طلبات نعم نحن في بعد عندنا شوائب وعندنا تربية مشوهة وعندنا ناس مشوهين نفسيا وهذا أثارة بتنعكس علي العلاقات فيما بعد مثل ما قولنا بالبدايه يعني بندفع ثمنها لاحقا ۔۔۔۔۔ بصوت " ديانه "

 

القصة التانية واحدة من إعلاميات الوطن العربي الشهيرات بما يخص موضوع المرأة استقبلت مرة رسالة من إحدي المشاركات معها بالبرنامج عم بتقولها انه انا خطيبي يمكن او الشاب اللي مرتبطة معه مديني مساحة كبيرة وتاركني علي حريتي بطلع بفوت بدخل بدور علي شغل و أنا الصراحة مش مطمناله يعني فالاعلامية وقتها ضحكت أنه أه وشو كمان بيخليكي تعملي ، قال لسه ناقص يخليكي تعملي كذا وكذا وكذا بإشارة او برسالة لانه الراجل اذا ما كان حمش وعنيف وبيمنعك عن أنه تخرجي وتلبسي علي كيفك معنتها ده مش رجل ، حتي مفهومنا عن الرجل والرجوله والشراكة اللي بنتلقها من الرجل مشوهة يعني حتي المرأة مع أنه هي بتحب يكون لها كيانها الخاص وإستقلاليتها وحريتها لكن اذا الرجل اذا كان عاطيها هاي المساحة انه هذا اله قرون شو هالرجال اللي تارك مرته او خطيبته او حبيبته علي راحتها شو بتعلقي علي هالموضوع ؟؟ ۔۔۔ بصوت " مها "

 

صحيح ، لأنه هون بنرجع للعم قلك عم نرجع للتربية الذكورية بنرجع لكيف نحن بالمجتمع الذكر ينشئ وهو أنه لازم يكون مسيطر ولأنه انتبهي مها لأنه هو بيخلق وهو بيتربي علي هيدي الاشياء بيسير في عنده ازدواجية معايير يعني الذكر متاح لإله يعمل شو ما يعمل بس بيمارس هيدا الشئ مع الانثي ولما نشوف نموذج مغير بيصير هو الغلط يعني لأنه السائد هو الشئ اللي هو مفروض انه هو غلط يعني فانتي اليوم بيصير اليوم الصح هو الاستثناء والغلط هو الشئ الشائد للأسف بالمجتمع العربي ما عاد عندنا هايدي النماذج وبكثرة وبعد عندنا هايدي الرجال اللي هو بيصير بدو يتدخل بلسبسك شو لابسه لا انا بيناسبني ها القد الطول ما بيناسبني

بيشعر بان رجولته بانه يفرض هايدا الاراء علي المرأة علما انه رجولة الرجل تكمن في شغلة واحدة بس هي بدها اياها المرأة من الرجل الإطمئنان والامان مش اكتر من هيك يعني انه انت بتكون رجل وتملك كل حياتي لما تحسني بالامان احساس بالامان انك تقدملي الحب الحب هو أمان أنك تقدملي مستند فيك انه انت سند بحياتي هايدا بيعطي أمان انك تكون صديق عنده القدرة علي انه يسمعني ويحتويني هايدا الشعور بالأمان فهادول بيجوا باي ديفولت اذا انت كنت مأمنلي كل هايدا بس لا الرجل بالمجتمع العربي بعيد شوي عن هايدا للأسف ۔۔۔ " ديانه "

 

كمان موقف من يومين حصل هلا هو من زاوية تانية مختلف شوي القصة في جروب بيشكوا عليه الناس مشاكلهن وقصصهم سواء بأسماء مستعارة أو بأسماء مجهولة أو بأسمائهم الحقيقية فكان في صبية كاتبة مشكلتها انه انا وزوجي مبسوطين وعايشين لكن عنده مشكله وحيدة أنه بيحيكي تليفونات مع امه بشكل مبالغ يعني ممكن يقضي القعدة كلها فاتح خط مع امه وعم يحكي صيرت حس حالي ما عم اتحمل طول الوقت اتصالات مع امه اتصالات مع امه لمرة كنا متفقين انه بدنا نقعد نسهر ظبطنا قعدة ونتفرج علي مسلسل ناطرين نحضره سوا فكمان اجته الاتصال وبلش يده يحكي معاها اجيت انا صيرت هيك اعلي التليفزيون بشكل مقصود علشان بس حاسه انه يلا وصيرت قوله يلا وهيك قم اجت امه لحالها يعني زوقيا قالتله خلاص رح اترككم وهيك فهو انزعج سكرت امه الخط بس امه سكرت الخط عصب علي مرته قالها امه زعلت وسكرت الخط كرمالك وكرمال لشو وقام قلعها من البيت ۔۔۔ بصوت " مها "

 

ايه ! " ديانه "

 

قلع مرته من البيت كرمال هادا الموقف ! هلا واحدة من  المعلقات قالت انه واحدة من أزمات المرأه الشرقية العربية خاصة انها بتعيش طول عمره مقموعه من الاب من الاخ من ابن العم من جوزها ما بيطلع لها بها الدنيا غير ابنها انه هي يعني اتطلع ولو نوع من السلطة وهيك تفسير تصرفات حماتها يعني وعلاقه الابن مع امه فانتي شو رأيك ۔۔ بصوت " مها "

 

أنا اعتقد تفصيل أخر يعني شو اعتقد أنه نوع في فطام نحن الام تفطم الطفل يعني هي بترضعه وبتفطمه او حتي لما حبل الوريد ينقطع في امهات عاجزات عن انه يقوموا بهادا الشئ يعني بيضل هادا الشئ متواصل معاهم حتي لو الولد صار كبير ومجوز وعنده عيله وعنده هايدا وهايدا الشئ نفسي جواتهم يعني فهي الام بتضلها تحس انه لا ابني بعده ما قدرت تعمل هايدا انه هايدا الانفصال والانقطاع بينه وبينه فهالسبب بتشوفي هايدا النوع وبتدبيه علي هيدا المبدأ يعني انه لما انزعج وطلع مرته من البيت لأنه هو اتربي علي مبدأ أنه أمي أولا يعني ما اتربي علي مبدأ أنه امي موجودة ولها كيانها واحترامها ووجودها بحياتي مهم وفي انثي تانية امراه وهي شريكة حياته والها كيانها واحترامها ووجودها بحياتها مهم واساسي يعني ليش ما بنربي انه في توازن كل شئ اله وقته وقيمته ومكانه يعني ما في الام تلغي الزوجة ولا الزوجة بتلغي الام وهايدا الشئ اللي لازم نحاول نربي أطفالنا عليه لحتي يكبروا وينشأوا برجولة مكتملة ۔۔۔۔ بصوت " ديانه"

 

طلبت من ديانه تخبرنا من تجربتها وتجارب ناس عرفت قصصهم شوي أشياء اتعلمتهم واستفادت منهم لما تم تطبيقهم ۔۔ بصوت " مها "

 

بوجود الأخر بحياتك والأخر مش بس الحبيب يكون حتي امك بيك يعني دايما ما نرهن ساعدتنا بوجود أشياء محيطة فينا لأنه هايدا كمان الشئ متعب للشزيك ومنهك وأهم شئ إني لما اطلب منه يتغير يعني احنا لازم نسأل حالنا سؤال كتير مهم لما نفوت بعلاقة ونتعرف علي شخص هايدا الانسان نحطه هيك علي مشرحة يمكن نشرح شخصيته ونشوف شو نقاط اللي عنده واللي انا ما بحبها قبل النقاط اللي بحبها واسال حالي سؤال قد ايه بقدر اتعايش مع هايدا النقاط قد ايه بقدر اتقبلن بحياتي لهدول النقاط لاأنه ما في انسان بيتغير اللي هيصير أنه فيما بعد أنه أنتي رح تتغيري اذا طالبتي بالتغير لأنه انتي رح تشوفي انه في اشياء جواتك عم بتموت فيكي فيفضل أنه تسألي حالك هيدا السؤال ولا تطلبي من الاخر انه يتغير لأنه ما راح يتغير  ۔۔۔ بصوت " ديانه "

 

بس ما بيتناقض هالشئ مع الفكرة اللي حكيتها قبل شوي انه نتطور سوا ونتغير سسوا ؟ ۔۔ بصوت " مها "

 

نتطور سوا بس مش نغير عادات انتبهي ! في اشياء بتطور بمراحل الحياه انك تطوري حياتك شئ وانك تغيري شخصيتك شئ تاني انه نمشي رحله سوا هايدا شئ بس يكون عنده طبع مثلا يمكن يكون هو بيكره يروح علي البحر ما بعرف يعني طبع معين بشخصيته اذا انا ما بعرف اتعامل معه يعني ممكن يكون عصبي بيصرخ اذا انا ما بقدر اتعايش مع العصبيه من البدايه لازم أكون أنا واضحه مع حالي انه هايدا الموضوع انا بتقبله بس انا ما بتقبل البخل اذا اتعرفت علي شخص وحسيت انه بخيل ما بخطي خطوه تانيه معه في اشياء ما بتتغير بس اذا بدك تطوري بحياتك وتطوري بكيانك انتي هايدا مرتبط أكتر بالذات والارتقاء بالروح اكتر من أنه صفات شخصيه ثابته فيكي ۔۔۔ بصوت " ديانه "

 

طيب قبل الختام بس هيك محظورات يعني شئ خاصة للصبايا بليز أنا بحسن بهالوقت مشتتات جدا لا تعملي هيك ۔۔ اتجنبيه مثلا ۔۔۔ بصوت " مها "

 

ما تستخفي بقيمتك أحيانا البنات بيكونوا بيركضوا ورا قصة الحب أو انه يدورا علي شخص لانه ربينا علي أشياء ضل راجل ولا ضل حيطه أنه منخاف من العنوسة منخاف أنه ما جيب ولاد منخاف ما جرب الأمومة بحياتي بنخاف من كتير أشياء يعني هي هي كلها عبارة عن أوهام الحقيقة لأنه نحن لما بنقرب من شئ اللي بنخاف منه رح نكتشف أنه هو ابسط بكتير من خوفنا منه الخوف هو اللي بيكبر الاشياء وبيخليها تصير علي القد مرعبة فالبنت تبقي عم تدور علي اي شئ لانه عندها هالقد مخاوف تخلصي من مخاوفك قبل لانه بس لما تخلصي منهم كلن رح تلاقي الشخص اللي بيحبك واللي بيقدرك واللي ما بيستخف فيكي ۔۔۔ بصوت " ديانه

 

مع "ديانه" ختمنا سلسلة "حب وعلاقات" انتظرونا بسلسلة جديدة بموضوع مهم لكتار منكم رح نعلن عنه قريبا من هلا لوقتها فيكن تسمعوا الحلقات السابقة من بودكاست صارت معي عبر زيارة موقعنا أخبار الآن ۔ نت في قسم البودكاست

أو من خلال تطبيقات البودكاست المختلفة

مثل أبل بودكاست إذا كنتم حمله ايفون،  أو جوجل بودكاست اذا نظام موبيلاتكم أندرويد أو من خلال ساوندكلاود ، ديزر ، أنغامي ، سبوتيفاي

 

شاركوني أفكاركم وتعليقاتكم واتواصلوا معي عبر الواتساب 00971568531592

بالاعداد والتقديم برافقكم دايما أنا " مها فطوم " الي اللقاء ۔